بسم الله الرحمن الرحيم
السلام عليكم ورحمة الله وبركاته
ـــــــــــــــــــ
لبّى مواطي رجلتس اللي بالإيمان = سارت على طهر وبياض العمايل
يمّه على هونتس فـ لانيب مرضان = كفي دموعٍ فوق خدتس همايل
لا تتعبين القلب يمّه والأعيان = من شاف ذاك الزين شاف الهوايل
في زينها شيءٍ كما بنت سلطان = تجمع تروف الغيد تحت الجدايل
والعقد فوق الجيد للعنق سجّان = العنق بي العنق وافي خصايل
هي كلها في بعضها صار هيمان = ( ديرة ترف ) تمشي وأنا مير اخايل
الجادل اللي لا ارتمى فوق الأمتان = يا تلّ قلبي من دلاله تلايل
تلة أسيرٍ حطه الله بقشران = عزيز قومٍ لكن العزّّ زايل
ماله سوا يصبر على جور خبلان = ويكتب وصاته في وضوح النصايل
يمّه هويت اللي لها عود ريان = ويرسل هدبها في صميمي نبايل
وغزة نهدها كنها بيض حوران = في عالي المرقاب صعب المنايل
واليا حكت في ثغرها طعم رمان = مثل النحل جوها شيوخ القبايل
شيخٍ يسوق من الذهب غالي أثمان = وشيخٍ توقّف حيلته دون الجمايل
لين افزعوا له ربعه اللي لهم شان = شجعان راحوا يفعلون الفعايل
ربعٍ على الطوله قرومٍ وفرسان = يردون حوض الموت فوق الهزايل
لا جردوا بـ أيمانهم شهب الأيمان = حدب السيوف مفرقات الخلايل
جت مع صهيل الخيل عزوة قهيدان = اللي على الطولات بـ العون طايل
ماهوب ذاك اللي عن الخير نومان = وزودٍ على الصفره ينام القوايل
مير الربوع اللي نخاهم كحيلان = شيخٍ ورى الهيات صايل وجايل
ردوا بذود القوم والخيل والضان = وشلفا الشجاع اللي تنول النوايل
وحطوا على الياقوت لولو ومرجان = وريش النعام وناعمات الخمايل
ومن الجواهر ساقوا أشكال والوان = وشيءٍ عجيبٍ مالقوا له مثايل
ومن ورث كسرى معه قيصر وهامان = وقوافلٍ من خير ربي تمايل !؟
( كله لعين اللي له القلب شفقان = أم العيون السود بنت الحمايل )
يمّه بدعت القاف مانيب طربان = ولابي جنون ومسّ والا هبايل
يمّه بدعته ليه ؟ ودي وطمعان = أكسب غلاها يوم جتني دلايل
دلايلٍ من طرف مكحول الأعيان = يومٍ صد الرمش والكحل سايل
ومن البكا ثوّر بها الشوق بركان = وهلت لي العبرات بنت الأصايل
لبيت وجيت وقلت وش صار وش كان ؟ = قالت علامك ماترد الرسايل !؟
قلت : أبشري وبـ القاف سيلت وديان = بأقصى جنوب القاع وأقصى الشمايل
( يمّه وردت المجد ما أحتجت لإنسان = وأرويت عرقي منه لين الثمايل )
و ( المهره ) اللي حيرت روس شجعان = عسفتها وأعدمت كل الوسايل !
عافت عطايا شيوخ من روس قحطان = ولدت للشاعر ( زايدي ) النسايل
يمه على هونتس فـ لانيب مرضان = أنا على خبرتس ( عريب السلايل )
....
الشاعر / محمد بن عبـدالله المهنـّـا الشكـره