البارحه يوم أن نور القمر مال = وعيـون خلـق الله غلبهـا الرقـادي
غارت علي همومي أنـواع وأشكـال = هجـاد ... ياليـل العنـا والهجـادي
هاذي تعل القلب مـن عقـب الانهـال = وهاذيك تطعن فـي رهيـف الهنـادي
لين أقتلت في مهجتـي كـل الآمـال = وأعلنـت فالقلـب الجريـح الحـدادي
ويوم أني خفت الهم يلحق على الحـال = قدحت في جـوف القصيـد الزنـادي
وسويتلـي دلـه وصبيـت فنـجـال = لـ.. هل المثايل فيـه سبـع القنـادي
ألقابـه السلـوان مـع راحـة البـال = كنـي هـل النـدّر نهـار الـهـدادي
وعقب أرجهن البال فكـرّت فالحـال = واقع مرير .. لوقالت النـاس عـادي
ناسٍ تحسب الطيب في زيف الأقـوال = هاموا علـى ماقيـل فـي كـل وادي
هم يحسبون النـاس تجهـل بالأفعـال = لاصـار ماللقـول ناتـج حـصـادي
يالله دخيلك من بلى بعـض الاحـوال = لاسلم .. لامذهب .. ولامـن مبـادي
وقامت هجوسي تحتضر بعض الازوال = بادوا لكَن الطيـب منهـم مـ.. بـادي
والطيـب يبقـى لوتقافـن الأجـيـال = تفنـا اليديـن ويبقـى نقـش الأيـادي
وراعي الكرم والطيب تضرّبه أمثـال = في سيرتـه ماجـف حبـر المـدادي
مثل السخي شيخ الكرم طيـب الفـال = ألـي شهدولـه حضرهـا والبـوادي
شيخٍ لعينا الطيب يدعس علـى المـال = عنده كريم النـاس صـار أقتصـادي!
له مجلـسٍ للخلـق منـزل ومدهـال = وريـفٍ لربعـه فالسنيـن الـشـدادي
وألا مواقيفـه مواقـيـف الأبـطـال = ياقف آلين يجـلا البيـاض السـوادي
ولو تلحقـه سـو المنايـا والأهـوال = عن موقفـه ماأهتـز طرفـه وحـادي
أبوسعـد لاصكـت الجـال فالـجـال = له فزعـة مهلهـل وصبـر المهـادي
من روس لابه مجدها بروس الأقـذال = لاد الحبيبـي سقـم كبـد المـعـادي
رحـل وقفّـى لكـن الطيـب مـازال = لاطروّا أسمـه فـاح عنبـر وكـادي
رحل وورّث عاطـر الذكـر وعيـال = ذخيرتـن تسـوا كـنـوز الـبـلادي
ولوقيل مات الطيب من مـوت رجـال = لقول مات الطيب مـن مـوت هـادي
فيـاالله يامنـزل تـبـارك والأنـفـال = محصي القرون المرمسـه والجـدادي
ياباسـط الارضيـن وأوتادهـا جبـال = ويارافعـن سـبـعٍ بلـيـا عـمـادي
تمـد قبـره عشـرة أميـال بأمـيـال = مد البصـر شـوق النظـر ياجـوادي
وتمطر عليـه امـن الهماليـل همـاّل = نـوّنٍ ينثّـر مـاه رايــح وغــادي
وتجعل له الفردوس مـاوى ومنـزال = وتضلـه بضلـك بـيـوم التـنـادي
مـع النبـي وأصحابـه الغـر والآل = آمين .. في جاهـك يـارب العبـادي

صح ألسانك

وجعل يمينك سالمه ولاهنت طال عمرك


والله يرحم هادي المصارير ويسكنه جناته أنشالله

تقبل شكري والتقدير