::: مـنتدى قبيلـة الـدواسـر الـرسمي ::: - اقتراح لابناء قبيلتنا الكرام

السلام عليكم ورحمة الله وبركاته
اولا : اقتراحات جميله جداً ..اتمنى انها ماتكون مجرد كلام..
ثانياً : انا بقول هالكلام واتمنى اني الاقي صداه بقلوبكم وماتزعلون علي..!!
بصراحه اللي انا الاحظه في قبيلتنا ورجالها هو كثرة المهايط ..!!
( على نمط احنا بنسوي وبنفعل واحنا الدواسر ..ومن هالقبيل..)
لكن في الواقع مافيه اي نوع من التكاتف ولا التنفيذ .. يمكن تقولون وش اللي يخليني احكم عليهم بهالشي بس انا بقول الاسباب وجايز اكون مخطئه بس هذا اللي انا اراه وغيري يراه..
1- جميع القبايل او غالبها سووا لهم مزاين واحنا توقف مزاينا على اسباب تافهه تدل على انفكاكهم الداخلي..علما بان الدواسر اولى الناس بهالمزاين.
2- دية اخونا وابن عمنا سيف الى الآن مااكتمل المبلغ مع طول المدة علما بأن هناك من الدواسر اللي لو زكى امواله بس راح يغطي المبلغ وزود..
3- يوم صار تصويت لابن عمنا بن دهيم في برنامج المليون بان تخاذل اللي تعزوا بهم وطلع من البرنامج مع العلم ان لوكل واحد من الدواسر صوت برساله وحده بس كان كفته للترشيح وزود..و هو الدوسري الوحيد اللي بالبرنامج..واللي يقهر ان الدواسر مشهود لهم بالشعراء الفلاطحه..فالشي اللي يطرح نفسه ليش هالغياب الاعلامي وينكم عن باقي القبايل ادري ان هالشي ماراح يضيف لهم ولا لتاريخهم شي بس ياليت كل شي يعطى حقه.
اللي احسه ان كل واحد يبي يثبت نفسه على حساب ابن عمه وتنسون انكم من قبيله وحده وان حولكم قبايل اقل منا في الامجاد والاصاله (وانا ماانتقص من احد ) بس حاولوا يطورون انفسهم ويلمون شملهم..واحنا عايشين على امجاد اجدادنا اللي سووها من قبل لكن انتو وش سويتوا !!؟؟ وبأيش خدمتوا وطورتوا قبيلتكم فيه!!؟؟
اتمنى....ثم اتمنى...ثم اتمنى.. انكم تتقبلون كلامي بمنطق ومحد ياخذ في خاطره من اسلوبي ولا يزعل علي..لاني بالنهايه بنتكم وماقلت هالشي الا لاندفاعي وغيرتي على قبيلتي..
وتقبلوا تحياتي :: اختكم بنت صقور..