يازين فعل(ن) ياالدواسر فعلتوه = فعل(ن) سبقتوا فيه كل القبايل
حتى لو إن الناس بعدين سووه = أنتم هله من قبل وأنتم الأوايل
قلتوا كلاماً للضيوف وحميتوه = وعاداتكم بالضيف فعل الجمايل
يوم المزاين بينكم ما احتكرتوه = ماعودوا ضيفانكم بالفشايل
من كان معه مشاركه مامنعتوه = ماقيل ذا واجد وذولي قلايل
بينتوا العلم الجميل ورفعتوه = للي يحسّب دقّها والجلايل
تستاهلون الطيب ياللي عملتوه = ويفوز بالطالات من كان طايل
ماهمكم مال العناء لو جمعتوه = ماباقي إلا الفعل والمال زايل
هذا طريقاً للنشامى رسمتوه = إلا الذي سلمه عن الطيب مايل
قررتوا الدرب الصحيح وفرضتوه = مثل القلايد في رقاب الأصايل

دن القلم لي وناصع الطرس هاتوه = الوقت حان لصادقات المثايل
هاج القصيد وصابني منه مشروه = ولا جت مواجيبه يجي له ملايل
يزمر كما حر(ن) من الوكر هدوه = ولا كما واد(ن) من الغيث سايل
سمعتنا دسمان لا فض له فوه = وطربتنا لأبياته اللي دلايل
يجبرني المعنى على قافية أوه = ولا ترى لي في قصيدك مسايل
مدحك بربعي يافتى الجود سمعوه = وتفاخروا به ياكريم السلايل
تثني على اللي طيّب الفعل سنّوه = وتوارثوه من الجدود الأوايل
آلاد زايد من شكى الضيم لبّوه = ويفرح بهم منهو زمانه تمايل
والطيب فنجال إلا منه صبّوه = ينساق للي يكسبون الجمايل
ورجم المعالي ياسبيعي رقيتوه = وساع البشوت وكاملين الخصايل
وبافعالكم ثوب المراجل لبستوه = وأشباهكم بين القبايل قلايل
يقوله اللي شاف... ماقال قالوه = وعاشر نشاماً يكسبون الطوايل
حازوا على الفعل الجميل وتحاموه = وتميزوا بالطيب بين القبايل
وهذا جوابي ياهل العرف حطوه = في صفحة(ن) فيها تخط الفعايل