الشعر ديوان الرجال الاولين=من عصر جداني ومن عصر النبي
نحفظ به حقوق الرجال الطيبين=ويردده شايب وشباب وصبي
وانا احنه من يدين العابثين=واقدره تقدير رجالٍ ابي
اخزنه تخزينة الكنز الدفين=واقدمه دام القصايد واجبي
اقنص به وماعود الا بالسمين=تقدير لهجوسي وحشمه لشنبي
واليوم في جمع الرجال الغانمين=تنخاني الاصوات وانخا منكبي
تقولي لبيات زيني وازين=واقول زينيلي علي مانا ابي
زينيلي ومديلي الدر الثمين=ابغي الجماله لو مانيب اجنبي
يامرحبا ترحيبتٍ تقبل بلين=وتحب خشم الزايدي والتغلبي
ربعي هل الطولات من ماضي السنين=من عصر كسب الابل ومن عصر السبي
ناسم عصا دخيلنا وسمٍ يبين=ويعيش فحمانا غني حرٍ ابي
وكبيرنا يجعل قسا القاسي يلين=ويوم اللقا يظرب ولاهو يختبي
وصغيرنا وافي وتفكيره رزين=والي قنص لرنب يعود بالظبي
يعرف علوم المرجله عاده جنين=ويكرم الضيفات لاقده يحبي
هم سيفي البتار والدرع المتين=لا حذفٍ بيض النسا سود العبي
وانا لهم رمح وذرا حصنٍ حصين=في فزعتي في ماكلي في مشربي
اطلب رضاهم فالزمن دنيا ودين=والي رضو عني تحقق مطلبي
الناس تكسب بالبويتات الثمين=وانا رضاهم في حياتي مكسبي
ويامرحبا ترحيبتٍ تقبل بلين=وتحب خشم الزايدي والتغلبي

مرحبـا ترحيبـتٍ تقـبـل بلـيـن = وتحـب خشـم الزايـدي والتغلـبـي