حنّيتك في نبرتك يابنية = حتى ولو تتصنعين القساوة
ريلاكس حاكيني شوية شوية = أنتي تعرفيني أحب الهداوة
وإن صار مني أي ذنب وخطية = قولي عليها وأبشري بالرضاوة
ولو سقتنالك كل ما أملك عطية = لاتقول يكفي ياحبيبي تشاوه
قبله قد أهديتك خفوقي هدية = ماقلتنالك غير صونه وداوه
هواك ليتك ياأريش العين زيه = واللي هواك بصادق الحب هاوه
خلا قفص صدري شظية شظية = أفتح قفص صدري لطيري وآوه
جفت زهور الحب وأول ندية = أمطر مطر وصلك عليها برهاوة
رجع لنا ايامنا الأولية = طفلين نمزج بالبراءة شقاوة
من يوم شفتك قلت وش ذالبلية = حلاوةٍ حطت بفمها حلاوة
يجملك خلق وأدب أجودية = ويميزك ستر وحياء ونقاوة
تخضع لك ديار الجمال الأبية = وتاخذ على كل المزاين أتاوة
البدر من وجهك عكس نور ضية= والليل من شعرك يخيّط فراوة
واليد أحس إنها تذوب فيدية = والخد ويلي ويل آخر طراوة
والعين فيها سحر مع جاذبية = لاسلهمت صاب الخلايق فهاوة
ماكنت تتركني بروحة وجية = دايم تواصلني حبيبي بسخاوة
حتى تغير نظرتك حيل فيه= بأسباب من خلا المحبة عداوة
كل يوم ترسل لي همومي سرية = وأنا أواجهها بعزم وضراوة
ماذقت من فرقاك نومة هنية = كنك موصيني على الليل خاوة
وتفجرت في غيبتك شاعرية = وقصايدٍ ماقلتها من فضاوة
لاوالله إلا من حياةٍ شقية = ومن قلب كنه يصطلي فوق تاوة
هدمت جدران المحبة القوية= إن مابنيت الحب يافلان ساوه
لاتحسب أعذارك بتمشي عليه= حفظتها لك صم ماهي تلاوة
وإن رحت ودعتك بدمعة خفية= وإن جيتني أستقبلك بالحفاوة

هواك ليتك ياأريش العين زيـهواللي هواك بصادق الحب هاوه خلا قفص صدري شظية شظيـةأفتح قفص صدري لطيري وآوه جفت زهور الحـب وأول نديـةأمطر مطر وصلك عليها برهاوة