يقول عمـرو مطلـع القـاف مبـداه=باسـم الالـه اللـي عزيز<ن>جلالـه
الواحـد المعـبـود كل<ن>تـرجـاه=ماخـاب عبـد<ن>لاذ بـه وارتجالـه
العالـي العـالـم علـيـم أبخفـايـاه=سامع دبيـب النمـل محصـى رمالـه
المعطـي الوهـاب جـزل العطـيـاه=لاراد لك خير<ن>وهـب لـك جزالـه
الراحـم الرحمـن ماهـي مـمـاراه=أرحم من الوالد علـي اصغـر عيالـه
هو الحكيـم الحاكـم العـدل بقضـاه=لاراد شىء<ن>كـاف نون<ن>مقـالـه
هو رافع<ن>سبع<ن>وسبع<ن>موطاه=مكـون تضاريسـه وباسـط سهـالـه
مخرج مراعيهـا وفـي جوفهـا مـاه=ومع السماء مزن<ن>تـر اكـم خيالـه
يحيي بـه الميـت ويسقـي رعايـاه=وحتـي يبـاس العـود رزقـه ينالـه
عقب اليبـاس وعقـب جفـة حنايـاه=تلقى الـورق بالغصـن يبـدي جمالـه
وهو خالق <ن>ادم من الطيـن سـواه=وعطـاه مـن روحـه وطيّـب لفالـه
وميزه عـن بـاق المخاليـق ميـزاه=بالعقـل والتفكيـر واوفـى خصـالـه
وهو مخرج<ن>ذا النون من غب ظلماه=في بطن حوت<ن>وسـط لجـه دعالـه
قــال انجـنـي يالله والله نـجــاه=ومع مامضـى أعطـاه ديـن ورسالـه
وهو فارج<ن> ليوب سقمـه وبلـواه=اربـع عقود<ن>كامـلـه واشتكـالـه
يالله انا مسـن مـن الضـر جرعـاه=وانـت الرحيـم وعالم<ن>كـل حالـه
قال أغتسل بالماء و تلقى بـه أشفـاه=تلقـى الشفـاء مـن علتـك والدوالـه
ومن بعـد ذكـره والتهلـل باسمـاه=جبـت المثايـل دون حيـف وميـالـه
نصايح<ن>لأهـل القلـوب النضيفـاه=يعمـل بـه العاقـل الياجـا مجـالـه
راقب إلاهـك واحفـظ الفـم وشفـاه=وايزن لهرجـك قبـل ترمـي حبالـه
الصمت يامكثر مـن الهـذر منجـاه=من خوف يفرح مـن يـدور الرزالـه
اللي يـدور أبـك الخطـاء والرديـاه=نوب<ن>قريب وحامل<ن>عنـك قالـه
وأحذرك ياغافـل تـر العمـر يقفـاه=ديــان عدل<ن>مايخـلـي حـلالـه
لـو طالـت الايـام وأورت حلايـاه=لابـد مـا الحصـاد يجنـي سبـالـه
هذي حقيقه صـدق ماهـي خيـا لاه=كل<ن>بهـا فانـي وطـاوى رحالـه
لاشك قبـل المـوت عنـدي وصيـاه=بأبيـات جزلات<ن>ولابـه هـزالـه
حافظ علي الدنيا وخمـس الصـلاواه=واقـم مواجيبـك مـع اهـل الشكالـه
اللي لهـم بالطيـب مجد<ن>ووقفـاه=صعول الرجـال محلحلـة كـل قالـه
وجنب عن اللـي ماينومـس بطريـاه=فعـال قــالات الــردا والـرذالـه
من عاشر الاجرب علي الحول تطـلاه=وكل<ن>علـي التـوأم تبيّـن فعـالـه
وكل الرجال اشبـاه شكل<ن>وميـزاه=ولاكل رجل<ن>ينحسـب مـن رجالـه
احد<ن>كما الشيهان طلـق الجناحـاه=مــدم المخـالـب ماتـعـلا ينـالـه
وحد<ن>كما الوكري شبيه<ن>لحليـاه=الريـش واحـد والـفـروق بفعـالـه
وكل علـي المنشـى يربـي صبايـاه=والحـر فـي بيضـه فسـاد وفسالـه
نـادر وملزوز<ن>وتبع<ن>تقـفـاه=مثـل الاصابـع بختـلافـه دلالــه
والجار لو انـه وقـع فـي خطايـاه=أرفـا جنابـه واعـذره عـن خمالـه
و الجود ماجاد الرجـل فـي عطايـاه=وألا البشاشـه نـوب تكفـي لحـالـه
والنعم مـا كـل<ن> ينولـه ويقـواه=رجم<ن>على الخايب صعيب<ن>منالـه
وان بـادرك بالطيـب راع المـرواه=بالطيب بـاد اللـي فعـل بـك جمالـه
والستر هو ساس الرجولـه ومرسـاه=ولاكل ساس<ن>ينجلـس فـي ظلالـه
ومن لا يعـز النفـس قبـل المنيـاه=أهبـيـت ياعز<ن>بذل<ن>تـنـالـه
ومن طاع نفس<ن>ماتميـز المشهـاه=يسيـر فـي درب الـرداء ماسعـالـه
ومن ذاق طعم المر يشفق على احـلاه=وكاس الحـلا صيـور يسقـي حثالـه
وختامهـا البايـح كمـا قـال انهـاه=باسـم الـذي ناصـب عوالـي جبالـه
وصلو علي اللـي وافيات<ن>مزايـاه=الهاشمـى جالـي طيـوف الظـلالـه