::: مـنتدى قبيلـة الـدواسـر الـرسمي ::: - قصيدة للشاعر تركي بن بخيتان بن ضافي المخاريم

- :: قسم قصايد مدح وفخـر في الــدواسـر :: (http://alduwaser.org/vb/forumdisplay.php?f=37)

قصيدة للشاعر تركي بن بخيتان بن ضافي المخاريم

إخواني الأعضاء والزوّار الكرام السلام عليكم ورحمة الله وبركاته أضع بين أيديكم قصيدة للشاعر / تركي بن بخيتان بن ضافي المخاريم التي ألقاها في حفل زواج صديقه كميّخ بن رويّض بن ماجد المساعرة آمل أن تنال على إعجابكم ................

بديت بذكر علاّم الخوافي=إله من لجابه ما يخافي
رحيم ورحمته تسبق عذابه=ويحيي الأرض من عقب الجفافي
ولا يعجزه في ذا الكون حاجه=وأمره بين نون وبين كافي
أساله رحمته وأرجيه عفوه=بيوم فيه تسليم الصحافي
بعد ذكره هجوسي يا هجوسي=تعالي وأقبلي لي بالهتافي
أبي منك المعونه وأسعفيني=بعد ربي على بدع القوافي
تعالي بالجزل يمّي تعالي=سمين القول ما نبغا الضعافي
لأجل لامن حضرت وقلتناها=تنول إعجاب رجال سنافي
تنول إعجاب من جينا من أجله=نزف التهنية من قلب صافي
نشاركه الفرح في ليل عرسه=عساه مبارك حفل الزفافي
كميّخ وإن نشد من هو كميّخ=خذوا الإيجاز والإيجاز كافي
كميّخ صاحب الكف النديّه=وبينه والبخل بغض وتجافي
وكميّخ صاحب الخلق المثالي=وهو وأيّاه خلينٍ ولافي
وكميّخ في الصداقه يقتدابه=مع الأصحاب والصدقان وافي
مهوب يبور كسّاب الجمايل=إلا من بار في الصدقان هافي
وعسى من بار في خوّة رفيقه=يصيبه من السعاده الإنصرافي
وكميّخ نسل عطبين الظرايب=((بني مسعر)) هل الشول الصخافي
هل الإبل من قديمات الليالي=ويشهد لي من العربان آلافي
حموها ((لاد مسعر)) واحتموها=ولا للقول هذا من ينافي
ديار الخوف تنزلها وتامن=وتقطف نبتها لامنه زافي
وإلى أحد ساقته نفسه وجاها=يقابل بالنادق والرهافي
يعوّد قده طامع بالسلامه=بعد ما شاف ما بالعين عافي
و ((وقيّان)) بفعله شاهد لي=كلام الصدق ماهوب الخرافي
ذكرت إيجاز وألاّ لو نفصّل=يطول الشرح ثم يشيب قافي
وصلى الله على الهادي وسلّم=عدد ما مسلمّ بالبيت طافي
ونهايتها تقبّل يا كميّخ=مشاعر تركي بخيتان ضافي

وتقبّلوا تحيّات أخوكم متحري الصدق