هاضت هواجيسي وفالطرس فضيت = ابيات شعر تعجب اللي قراها
وطيبتها بالطيب من شان للقيت = تعجب نواقيد الشعر من حلاها
وجمعتنا شرد المعاني المشاتيت = وخذيت نادر حكمة من حشاها
والمدح واجب في الرجال العناتيت = امثال ولد حزام رايم اعلاها
عبدالعزيز اللي يسرك ليا جيت = في مجلسه ترحيبته لك ثناها
في مجلسه ترتاح لامن تمركيت = تلقى رجال تسعد اللي نصاها
شيخ فطين فاهم ماتوريت = اعرف مناهيجه وميز قداها
له منهج يعرف وله جاهن وصيت = وافعاله اتنومس المنهو حكاها
وانا بمدح الشيخ قلت وتجريت = على قداي امشي وفكري بناها
هو مزبن الخايف ليا جاه في البيت = ياقف معه وشحون قلبه جلاها
وانا اشهد انك فالطويلات عديت = عديت بفعالك بعالي نباها
كم مشكلة جاتك وبالفكر حليت = حليتها واطفيت حامي لضاها
يوم اشكلت قسمة الاراضي تعزويت = وحليت مشكلها وكل رضاها
اخلصتها بسراع من يوم شديت = عزمك عليها لين وقفت رحاها
وقسمتها بين الرفاقه وساويت = وكل شكر سعيك ومثلك قضاها
ولك وقفة مع ولد فرحان واقديت = ساعة لجالك يوم ضاق بفضاها
قال العصيمي يطلب الجاه فزيت = وقلت ابشر بسعدك وعندي دواها
لاتشتحن منها بسيطه وجديت = واخلصت مشكلته ودندن صداها
ولاقمت فالازم تبي الحق وفيت = منتب تجي دونه تعدي وراها
افعالكم بيضا كما لشمس لاريت = ماشن يغطيها وكل يراها
وانته بدرب الطيب من يوم شبيت = واللي سواتك جعل يطول بقاها
ولا جا مجالك في مكان وطريت = قالوا نعم كل المراجل حواها
طيبه وشيمه هرجتي بالتثابيت = وكلمة لساني تبهج اللي دراها
ويالايمي فالمدح مجنون مخطيت = اعرف من امدح يوم الحن غناها
وختامها ياناس صليت صليت = على نبينا سيد الناس طاها