سلام ياساس الوفاء والشكاله = سلام مني عد وبل الرفيه
واعداد ماحول ابنك حواله= والذ من شهد النحل في الخليه
مني لبو سالم كتبت الرساله = رسالة مبنغى وراها جزيه
صقر على اسمه والمسمى غداله = طلعه بعيد ولا يصيد الرديه
نعم ببوسالم إلآ جاء مجاله = ونعم الخوي لامن نشد من خويه
طلق الحجاج وعون منهو شكاله = وعوق الخصيم إلياء انتو من نويه
له مجلس لاجاء المسير لقاله= برية والعود لزرق سويه
والظيف والمحتاج له في حلاله = قسم لهم من عند جزل العطيه
امعرب مابين جده وخاله = اهل الكرم والجود واهل الحميه
خنافر يوم الجهل والجهاله= تارد حياض الموت ورد الضميه
وياما خذو من زاهيات الشماله = واقفو عليها محتمين الونيه
وكم من عقيد جاو سبة زواله = برماحهم من فوق بنت العبيه
لاجا نهار فيه صوت وظلاله = والي سلم حطو بكبده لضيه
واليوم في الأسلام حكم وعداله= شيوخ لهم عند العرب مقدريه
فمادام ماقلناه يحكي خصاله = مدحه ومن مثله لزوم عليه
وبجاه رب البيت جل جلاله = صلو على المختار سيد البريه