قبيلـة ٍكـم فرقـت مـن قبيـله=وطقت شرايدهم وراحت نزايـع
ربع ٍ تقيـد بالسلاسـل ركابهـا=لا جا نهار ٍ فيـه ذبـح وقلايـع
سعيرة ٍ خطلان الأيدي وقودهـا=لا زعزعوا زايد وجات الفزايع
يمشي لهم جمع ٍ تنومس فعايلـه=يحط في الجمع الموالي هزايـع
يصعد براس النايفه من وزابهم=يوم السنين اللي تشيب الرضايع
كن الجنايز في نحايا جموعهـم=أعجاز نخل ٍ خاويـات ٍ صرايـع
قبيلة ٍ يعتز مـن يننتخـي بهـا=دون الجهام ودون ستر الربايـع
ديارهم محد ٍ نزل فـي حدودهـا=ولا طمعها من يـدور الطمايـع
تامن بهم سود ٍ طـوال ٍ رقابهـا=وسود الغروس اللي ثمرها نوايع
قصيرهم يرحل وهو في جوارهم=وينزل لحاله في قفر كـل خايـع
اللي يصافيهم له احلى من الشهد=واللي يحاربهم يـذوق الفجايـع