ترى نبش الجروح المستديمه=عواقبها على السائل وخيمه
تثور اعصاب راعيها وتبلش= ولولا العقل مال الرجل قيمه
فالا ياصاحبي صبرك عليه=ترى النيه بوادرها سليمه
شمالي طبع وعتيبي حموله=ولجم كل عثره باشكيمه
ولكن الظروف احيان تجبر=عقيد القوم يكرب في بريمه
ولو اني اخفي كل حاجه=على وجهي تشوفلها وسيمه
حسبت ان الليالي ماتغيب=تجود وفي عطاياها كريمه
ولكن طبعها دارج وعاده=قبيحة وجه غداره عقيمه
فقدت اللي فقدته من وفايه=وصار اليوم عقب السيل ديمه
بروق الامس غابت واضمحلت=ولم يبقى على الافاق غيمه
على حلمً مضالي واوجودي=فرحت وفرحتي دايم يتيمه
صدمت بواقعً حطم طموحي=واخذت اليوم من وقتي قسيمه
اكابد وادحم الصدمه بصدمه=وقو الراس من قو العزيمه
كسبت وشفت والدنيا تعلم=وعرفت الفرق في سحمه وريمه
تشوم النفس للغالي وتطمح=وتبقى فوق مادامت حشيمه
عليه نجد ماضاقت فجوجه=احول من خريمه في خريمه
واذا هب الهواء منا ومنا=يروق البال مع بارد نسيمه
يذكرني بطيف اللي عليها=طروق العشق دايم مستقيمه
هنوفً تحتويني دون مدري=شرب قلبي غلاها في صميمه
اميرة خلق تسمو بالمحاسن=لها قيمه ولاهي بأي قيمه
خجوله لاحكت ياوجد حالي=تقول اني مبشر بالهزيمه
احاول قد مقدر في ثبوتي=ولكن هيبة الموقف عظيمه
شعاع الصبح في لبة نحرها=يامال القوم يالبة حليمه
تناديني بعكشً لاتلاقن=غريمً حط سيفه في غريمه
اروحلها وعود دون حاجه=اخاف الهرج من باب الظليمه
تعالي ياحلم مقعد وشوفي=بقايا العشق يامال الغنيمه
ترى كبت المشاعر فالحنايا=جريمه ياعرب واكبر جريمه
نزف حبري وهجس القاف كمل=وذكرى العشق لا زالت مقيمه