::: مـنتدى قبيلـة الـدواسـر الـرسمي ::: - الشاعر / مبارك بن سبف بن غالب بن ذهيبان آل حميد الرجباني الدوسري


	تعريف بالشاعر : الشاعر / مبارك بن سبف بن غالب بن ذهيبان آل حميد الرجباني الدوسري ، من مواليد وادي الدواسر ، ويسكن حالياً بوادي الدواسر في اللدام ، موظف حكومي . قال هذه القصيدة مسندها على الشاعر / حامد بن علي الحبابي يالله ياللي لك الوقت صليت = ياللي شفيت مضمدين الجباير يا مخرج الحي من داخل الميت = يا باعثٍ الخلق عقب الحشاير استغفرك يا عالم الغيب لا اخطيت = و أدخل عليك من الزلل والكباير أنا لعطف رضاك وحماك لديت = مستضعفٍ لك يا مدير الدواير ياللي خلقن آدم من طين واسويت = وخلقت حواء من ضلوع قصاير وجمعتهم في جنت الخلد و أرضيت = وحذرتهم من قول عاذل وشاير و أرخرجتهم منها وراحوا تشاتيت = وجمعتهم عقب الكلف والعباير أنا مقر لك بما أعطيت و أخذيت = عبدك على عهدك وما قلت صاير يالله أن تثبتني على القول تثبيت = في موقف تظهر جميع السراير و يالله أن تساعدني على الوقت لزريت = وقت محاربني بجيش وحضاير عديت ميل الوقت لكن ما احصيت = وصبرت مير الصبر زاد المراير وقت يضد اهل الوفى اللي لهم صيت = ويرفع بعض لشخاص لو كان حاير يرفع ردي الساس من غير تثبيت = وينزل أهل المرجلة والخساير ومن جور وقتي شمتنا واشمأزيت = ما لوم قلب من بلى الوقت حاير ومن الدهر جربت و أخذيت و أعطيت = والتجربة برهان في كل عاير وعينت صدقان الرخا يوم عديت = على المجرب من كبار الخساير وقت الرخا بالقول يعطيك ما شيت = يعطيك ما جوده وكل الذخاير وقت الشدايد لا تعنيت والفيت = لا مست الحبلين تلقاه باير عقب الصداقة والمناوي تمنيت = فرقاه في أيام الرخا والعساير ياكثر خلان الرخا يوم عديت = وعند الشدايد فايدتك العذاير يا كثر ما جربت واسمعت وأريت = عندي ثبوت وكل ما قلت صاير هذا ومن باقي زماني تبريت = وقت جعلني بين عاذل وشاير صديت من بعض المخاليق و أقفيت = رفقة بعض الأشخاص هم وحقاير عاتبت أنا وقتي بلوم وتثابيت = وقت علي لو قلت ما قلت جاير من أول لا هاجس القلب ضجيت = واليوم صغرت العلوم الكباير سكرت باب معاتب الناس و أغضيت = التايهه واللي تقص الجرايد وعزلت أنا من قول الاشعار وابطيت = والشعر يظهر خافيات السراير ما ادري عمس ولا من القاف مليت = ولا تسكر مغلقات الضماير و أنا ليا من هاجس القلب و اصغيت = خذيت من زين المثايل بصاير احكم الكلمة على القاف والبيت = من خوفتي من قول ناقد وقاير ولا خير في هرج على غير تثبيت = قول على غير الحقيقة حقاير والشعر له حاكم و نايب و عفريت = وكل على تحكيمه الشعر غاير و أنا مع أهل العرف و انويت = و أنا على المشوار مازلت ساير وسمعت أنا قول الحبابي وغنيت = اشتقت للمعنى بعزم وبصاير شعر الاديب اللي مع الناس له صيت = قوله كما الياقوت يعطي ثماير جاني شريطه في بلدنا وهليت = عد المطر واعداد رمل الزباير واعداد من صلى ومن طاف بالبيت = ترحيبة الغايب اليا جاك زاير ساعة سمعته فز قلبي وحييت = تعبير عما تحتويه الضماير اخذت القلم واخترت ما قلت وامليت = كتبت روس اقلام والعلم داير وجهزت مندوبي على الخط واوصيت = خط كتبنا فيه بعض السراير يلفي على حامد راعي لجود والصيت = قرم على الضيفان يعطي البشاير من لابة تاريخها له تثابيت = عزيز قومٍ من عزاز وقاير تعرف ليا من جا نهار التصاويت = بالخيل والا فوق سمر الحراير يامن على سطح المراجل تعليت = اسلم سلمت وجعلها لك سفاير هذا وصلي عد ما اصبحت وامسيت = على نبي حطه الله بشاير جمع و تأليف الشاعر مبارك بن سيف بن غالب بن ذهيبان آل حميد الدوسري رياض الأدب الشعبي