على خفوقي نثرت الشووق يالغالي =أصبح وأمسي وروحي بالوله غرقه
سيطر علي الهوى يا ويلها حالي=أضحك مع اللي ضحك وبداخلي حرقه
خل ٍ عيونه تصيب الطاير العالي =وش عاد أنا اللي صويب وصابني برقه
عشّق عيونه وصوّب خافق ٍ خالي =يا ويش أسوّي وقلبي مهتوي طلقه
لو القصايد تجيب الصاحب السالي =لنثر حروفي من أقصى الغرب إلى شرقه
مير القصايد تهوّن بعض الأهوالي =تعين قلب ٍ تجرّح واظطرب خفقه
ليت الليالي على ماريد تصفا لي =وأجرّد القلب من هم ٍ سكن عرقه
وآخذ قراري على كيفي ومن حالي =وأسوق عقلي على قلبي وعلى عشقه
إما يجيني حبيب الرّوح .. بالتالي =أقضي حياتي أنا ويّاه في رفقه
وإلا يولّي ولا به ينشغل بالي =وأنساه وأسلى بلا شوق ٍ ولا شفقه
أدري كبيرة طموحاتي وآمالي =وأدري استحاله حبيبي للهوى يفقه
لكن مدامي أمنّي الروح بالغالي =بصبح وأبمسي بنظرات ٍ تجي سرقه