يا نشيد السحر لعل يسلم من نشد= عزوته بـ أولاد زايد مزبّنة الدخيل
يطرب القمري ويمسي يغنّيها السرد=والحمام إذا سمعها يرتّلها رتيل
من رجال الأزد نعمين والعالم شَهد= ما نبي من خايب الجد والمفلس دليل
ربعنا الأنصار في الحرب واردهم ورَد= وحنظله منّا شهيد ٍ وفي الجنه غسيل
ما نهاب الموت لو كان في شدق الأسد=باعت الأرواح في السوق يسلم من يشيل
لو رصاص الحرب يهمى كما وبل البرد=فوقنا يا بو عليّ الجماجم ما تميل
وش بعد تبغى نحدّثك عنّا وش بعد؟=أقصر الهقوات تكفى ترى المسرى طويل
شيخنا لو جاك شوره تقل يازن بلد=وطفلنا من جودة الراي جا شيخ ٍ جليل
والنميمه والخنا سوقها فينا كسد=ما تسمّعنا لـ هرجة حقير ٍ قال قيل
ما تغزّلنا بـ سلمى ولا نوف ورغد=وما توجّدنا على الحُسن في الطرف الكحيل
إرتضينا منهج الله وبايعنا الفهد=وإنتسبنا للحنيفيّه الدين الأصيل
الله من علم ٍ وشعر ٍ على صدري زبَد= هايج ٍ مايج ينيّف على دجله ونيل
كلّما جيت أحبسه يا قصيدي هد .. هد=قام يغلبني بغزره وأنا جسمي نحيل
كم تدفّق مثل سيل العرمرم لـ أحتشد= حطّم الجدران من سطوته شال النخيل
والصلاة على محمد تسير بلا عدد= وآل بيته والصحابه خُلاصة كل جيل