[معلومات العضو ابوشالح النتيفات]

السلام عليكم
بدون مقدمات
أترككم مع قصيدة
" الرجال "

يالله يالمطلوب ياعادل الميل = ياللي خلقت الكون شرقه وشامه
يسر لساني لابخس الوزن والكيل = بنات فكري جات ورد حيامه
ونا أحمد الله قدمها الوادي يسيل = يسيل وصف وما عليها ملامه
بقول هرج واضع له معاديل = ما أمشي مع درب الردى والندامه
ترى الرجال اشكال جيل بعد جيل = من عهد ابونا ادم ليوم القيامه
لكن ياطيب الرجال المشاكيل = أهل الوفا والطيب وأهل الزعامه
ويا طيب منهو للصعيبات حلحيل = متسلسل من روس قوم الشهامه
اللي ليا ثقلن الأحمال بيشيل = يردها لو كان تاصل تهامه
أهل الكرم يوم الليالي تهاويل = تفخر بفعل الطيب والابتسامه
مكرمين الضيف بالبن والهيل = زود على الترحيب يعجب مقامه
بالطيب يشرب من عذي المناهيل = ياخذ حلال الهرج ويترك حرامه
ما هو مثل اللي قليل المحاصيل = لو كان يفعل طيب كشر علامه
وبعض الرجال اصنام والا تماثيل = لا نافع ربعه ولابه قرامه
لامن نظرته قلت يا ويش ذا الخيل = يمد راسه مثل راس النعامه
خله يولي والليالي مقابيل = لو قال لك هرج يكبر كلامه
وبعض الرجال بمنظره كنه الفيل = قلوبها سود ومليا رخامه
الهرج شين وكلبوها دهاويل = أهل الحكي والكذب وأهل النمامه
نقاله للحكي والقال القيل = ياليت منهو شاف فيهم علامه
إياك تعطي مثل هذا تماهيل = أكرمكم الله كل هرجه قمامه
والا البخيل إياك تمشي معه ليل = جعله تحت في الارض تسعين قامه
هذا ترى ما يعد ضمن الرجاجيل = ودك مع الخفرات يلبس لثامه
وأهل البلاسة عينهم بالدرابيل = يدور الغلطات قل احترامه
مثل الثعل ينقز ورى يمايل الذيل = لا تطاوعه يبغى يحقق حلامه
عساه في لنعاش يرسل تحاليل = وخلاصة التحليل تبرد عظامه
وبعض الرجال يعارضون المهابيل = حياتهم راحت بوسط الغمامه
تطرد ورى الدنيا جموع وسرابيل = نسيو نهار فيه يكثر عسامه
لامن سئل بتضيع كل الدواليل = زرع زرعته شوف قدمك صرامه
واختام هرجي عد ما أنشا مخاييل = صلوا على اللي زال عنا الظلامه

وسلااااامتكم
الشاعر / شافي بن راشد النتيفات