السلام عليكم ورحمة الله وبركاته :
أعضاء ورواد هذا الصرح :
نظراً لغيابي المتكرر وغير المبرّر مهما كانت الأعذار
أجد نفسي مجبراً على المشاركة بمجموعة من القصائد دفعةً واحدة
لها تغفر بعض التقصير :
(1) (( روضة خريم))
دنّوا لنا ال( GXR ) وأملوه بنزيم=جيبٍ على الطرقة قـويّ العزيمـة
لونه كما اللولو حديـث التصاميـم=عقدٍ على جيد الهنـوف الوسيمـة
محطّمٍ صنـع (الولايـات) تحطيـم=جانا من (اليابان) من (هيروشيمه)
راعيه مايطـرب لعـزف وتقاسيـم=هواه : نبرات(الشريـم) الرخيمـة
مسراحنا عقـب الفجـر بالتقاويـم=للبر ياجعلـه مـن الوسـم ديمـة
شوف الخلا طب القلـوب المكاليـم=لاهاضت جروح الخفـوق الأليمـة
كبّ السياسـة وإنتكـاس المفاهيـم=الشعـب طيّـب والقيـادة حكيمـة
ياماحلا المجلاس في روضة خريـم=مع الرجال أهـل الوفـا والحشيمـة
"هذا ولـد عـمً " يعـز الشغاميـم="وهذا رفيقٍ " يفتخـر بـه نديمـه
الخد خضـرا والسمـا كلهـا غيـم=والغربي البـارد يذعـذع نسيمـه
وياماحلا في الروض شوف المجاهيم=يطرب لها القلب الشقي من صميمه
كنْها الجبال السود تمشـي مقاديـم=وألا كما ليـل الدجـا فـي عتيمـه
والضوّ مشعومـه بسمـرً تكاويـم=يجذب سناها العالـم اللـي إمقيمـة
من فوقها الرسلان صفـرً مواليـم=فنجالها يشفـي الكبـود الضريمـة
ومن حولها مزح وقصيد وتباسيـم=مافيـه لاغيبـة ولابــه نميـمـة
هذا ربيـع البـال لاناشـه الضيـم=من جاير أحداث الزمـان الوخيمـة
وأخير منهـا لأظلـم الليـل تظليـم=ركعـاتٍ لمحيـي العظـام الرميمـة
المرجلة ماهيـب سكـب المرازيـم=وسحب البشوت بكل حفل وعزيمـة
المرجلـة ديـن وشجاعـة وتعليـم=والجانـب الليّـن ويمنـىً كريمـة
من حازهن حاز إحتـرام المغانيـم=وألا الردي ماله مع النـاس قيمـة
وإختامها بأزكـى صـلاةٍ وتسليـم=على رسولٍ راضعٍ مـن (حليمـة)
(2) (( الشيب))
ـ نشرت في الجزيرة قبل أشهر ,
(بل جيتس) المذكور في القصيدة هو أغنى رجل في العالم كما تعلمون.
قالوا مشيّب ماوصلـت الثلاثيـن=الشيب في راسك تزايـد بـروزه
وأقول شيبي من قبل عام عشرين=أخفيه مير اليوم بانـت إحـزوزه
صارعتنا الدنيا وذقـت الأمريـن=والوقت جرعني المـرارة بكـوزه
فوق المتون جبال همً من اسنيـن=ولايمكن اتشوف المتون إمهزوزه
وإن كان تستغرب صمودي لذلحين=هذا فضـل ربـي وكـلً يـروزه
لاجيت بأستسلم وشفت الشموتيـن=كلً يحـد السيـف وإيمـد بـوزه
وقّفت وقفات الشيـوخ السلاطيـن=لوضامري فيه الرمـاح إمغـروزه
لوراس مالي في العمر كيسة طحين=تقول (بل جيتس) عطاني إكنـوزه
لاعاش رجّالٍ رضى بقول مسكين=وألا رضى بنظرات عطفً تهـوزه
أمشي على رأيي وحسب القوانين=يوم الردي يمشي برغبة عجـوزه
ماهمنـي ياكـون رب الثقلـيـن=إرضاه عندي غايتـي والمعـوزه
ويهمني لأرضيت ربـعً عزيزيـن=لهم مكانة في الضميـر إمحجـوزه
وأهل الوفا والطيب عندي حشيمين=لوكانوا (بمصر وشمال العجـوزة)
وإن كان ماتبنى العلاقة على الدين=يطيح مبناهـا وتسقـط إرمـوزه
(3) (( خاطرة))
يالله يافارجً لأيوب فـي الضيـق=يامنقـذً نـوح وأقوامـه غريقـه
يامدبر الكون في حكمـة وتدقيـق=يامحصي الثانيـة قبـل الدقيقـه
يارب أنا ذنوبي أمست كنها طويق=أكنّها ... وأنـت تعلـم بالحقيقـه
عنّي على النفس لجل آتوب وآفيق=من غفلةً خلّت إعظامـي رقيقـه
في الدين مانستمع ملحد وزنديـق=لكن هوى النفس رحنا مع طريقه
ياربّ من لي ليا من وقّف الريـق=في سكرة الموت والنزع وشهيقه
مالي سواك أنت ياربّ المخاليـق=ترحم ضعيفً نشف حلقه وريقـه
لك تسجد جباهنا خشيـة وتدنيـق=من خوف يومً تضيع إبه الخليقـه
يشيب فيه الرضيع وصدره ايضيق=والناس تسكر من أهوالًٍ وضيقـه
كلً تخلّى عـن أقـرابً ملاصيـق=حتى صديق العمر ينسى صديقـه
ويمدّ فيه الصراط أبـو المزاليـق=خاب وخسر صاحب الدرب الزليقه
أحدن سعيدً لبـارد جنتـه سيـق=وأحدن شقيً وفي النار السحيقـه
ياربّ عطفك ولطفـك والتوافيـق=عذنا من النار وأسباب الحريقـه
ماتقدر عظامنـا لفحـة وتحريـق=ونفوسنا لشوفـة الجنـة شفيقـه
(4) (( خاطرة2))
العمر يمضي والأيام يطويهـا الرحيـل=والليالـي لامضـت ماتعـوّد راجعـه
والبنادم لو هقى العمر قدامـه طويـل=كلها سبعيـن عـام وتحـلّ الفاجعـه
ومن يجاوز ذلك الحد لو أنـه قليـل:=الظهر محـدودب وصحتـه متراجعـه
لكن المحظوظ من سارع لطيب الحصيل=وراجع إحسابه قبل لا (العظيم) يراجعه
أنفق وصلى ولاطاوع ابليـس الذليـل=وإنتحب في الليل يوم الخلايق هاجعـه
قلتها وأنا ذنوبي من الـوزن الثقيـل=بس أطورق بالشعر والحمايم ساجعـه
يالله إني طالب ارضاك وبوجهك دخيل=ترحم اللي من زمانه شكـى مواجعـه
ماطلبت ألا أنت يامالك الملـك الجليـل=والبنـادم مايراجـع سـوى مراجعـه
(5) (( ياهل الترقيم))
ــ موقف تكرر أمام ناظري مرات عديدة :
الضمايـر همهـا قـام يـزدادي=يالله إنــا طالبيـنـك تزينـهـا
كلما غطّيت فـي جـوي الهـادي=شغّلـت صكـات بقعـا مكاينهـا
ياكحيل العيـن لاتقـرب افـوادي=صـد عنـي طالبـك لاتطينـهـا
والله أني من هوى البيض شدادي=والمحبـة خـارجً مـن مداينهـا
ياهل الترقيم في السوق والنـادي=كل من مـرّت غديتـوا رهاينهـا
والهنوف الفاتنـة رقمهـا بـادي=تكتبـه بـأوراق وألا بفاينـهـا
والنهاية فـي متاهـات وأنكـادي=تذرف ادموع الندم عقب خاينهـا
لو تشاهدكم محطـات الأرصـادي=خفتوا اللقطـات لا أحـدً يعاينهـا
وماخشيتوا من غضب ربنا الهادي=يوم يبصركـم ويبصـر كواينهـا
أدري إنكم من صناديـد الأولادي=لكن الشيطـان ينصـب كماينهـا
مير يمديكم على التوبـة ومـادي=ربكـم غفـار والنـاس عاينهـا
أمة الإسـلام تحتـاج الإمـدادي=تنتظر الأبطـال تنهـي غباينهـا
وأنتم الثروة لدعـوة ولإجهـادي=والعقيـدة يرتفـع راس صاينهـا
(6) (( يانجم))
إهداء لبعض المتطفلين على الشعر الذين يرون أنفسهم
نجوماً في الشعر والمرجلة وكل شيء :
يانجم ياللي حولك نجـوم وأقمـار=مابان نورك فـي سديـم المجـرة
ارفق على نفسـك وخـل التكبـار=يالابـسً ثـوب الغـرور وتجـره
أصلك تراب وترجع تـراب وغبـار=وفي ساعة المحشر تحـوّل لـذرة
لاتحسب إنك فاتح القـدس بالنـار=القـدس محتل..و..سرائيـل حـرة
الأمة إتعاني من جسيمات الأضرار=وبعض العرب فعله يزيد المضـرة
اسلم وسلم لي على سوبر استـار=وستـار أكاديمـي لـزومً تـمـرّه
أبطالهم غطوا على أبطال الأحجـار=يكرّمـون وعايشـيـن بمـسـرّة
ومحمد الـدرة غـدا شبـه تذكـار=أصبـح مـع الـدرة ثمانيـن درة
هذا زمان الذيـخ والبـوم والفـار=والحـر خلْـه ايـمـوت ..لله دره
والقدس ..يصبر..لين..تاتيه الأدوار=خمسيـن عـامً ثانية...ماتضـرّه
(7) (( علاج الهموم الداخلية ))
ليلة البـارح سـرى همـي عليـه=عزتي للراس من كثـر الطـواري
الرياض أمسـت شوارعهـا مليّـة=وأكره الزحمات وأصوات البـواري
ونشرة الأخبار في صبح وعشيـة:=قصف عشوائي وتفجيـر إنتحـاري
انصدع راسـي وصابتنـي الأذيـة=من متابعة الحدث ليلـي ونهـاري
وأعرف إعـلاج الهمـوم الداخليـة=دون ما أذهب للطبيب الإستشـاري
العـلاج بذكـر خــلاق البـريـة=مع صلاة الليل فـي ليـل الغـداري
والقرايـه للـحـروف الأبجـديـة=في كتـاب الله ومسلـم والبخـاري
ثم سجّات النفـس فـأرضً خليـة=في خباري نجـد ياحـيّ الخبـاري
فيضـةً بيـن الجبـال العارضيـة=توّهـا ممطـورةً والسيـل جـاري
بكّر الوسمـي عليهـا فـي مجيّـه=لين رويت من هماليـل العصـاري
ماوطاهـا قبلنـا خـفّ المطـيـة=ولاوطاها الكاشت بجيب السفـاري
ريحة إزهور الخزامـى النرجسيـة=والنفـل والشيـح لاهبـت ذواري
أحدث أنـواع العطـور الباريسيـة=وارد (القزاز) في (مركز صحاري)
وعشبهـا سـجّـاد زلً فارسـيـة=عند (أبومتعب) ومجلسه الـوزاري
ذي دواء روحي عسى روحي رضيّة=لاتوفّاهـا الولـي بآخـر مسـاري
يوم أشـرّف فـي نوايفهـا العليّـة=كنّ عندي خزنـة البنـك التجـاري
(8) (( إختلاف الماركات))
لها مناسبتها وتعبر عن نفسها :
ألا يا زمنا ماعبدنا ( هبـل والـلات)=ولانشـرك بربـي ولافـاز مشركتـه
ولانعبد اوجيه البشر في رجا المـدات=على الرغم من راسً لياليه عاركتـه
نعز النفوس ونرفض مصافح الهانات=ولو الدهر قدامنـا ينصـب اشركتـه
وللي دعانا واجـب نلبّـي الدعـوات=ومن لادعانا خطـوة الرجـل تاركتـه
رفيقً بوجهي يظهر البشر والضحكات=وهو من وراي يشن هجمات معركتـه
أجمّد علاقاتي معه وأقطـع الموجـات=وفي باقي المشوار ماأقبـل مشاركتـه
ماأحب التظاهر بالصداقة وهدر أوقات=مع اللي نهار الضيق مابانت ابركتـه
ياكثر اصدقانا اللي على خيرنا تقتـات=مادام البحر هادي ولاشانـت احركتـه
ولولا ظروف الوقت ومواجهة الأزمات=ماكان اتضح زيف المنافـق وفبركتـه
عطوني رفيقً في القسا صامل الوقفات=وأبعطيكم العشرات من عكس (ماركته)
وسلامة الجميع والمعذرة على الإطالة