هذه محاورة بين الشاعرين فلاح القرقاح وملفي المورقي
فلاح
على المطرف والموالي من نظيفين القلـوب
اثني سلامي عد ماهز الهواء غصن شجـره
الشمس تغرب فالبحر وسهيل يبدي من جنوب
والسيف وسم العز في انصابه وبطنه وظهره
ملفي
يالشاعر اللي جيتنا من شرق تدفعك الهبوب
يامرحبا مالاح برق الصيف وانهل امطـره
الشمس تطلع مير تاليهـا تعـود للغـروب
والسيف وقع في صفىً قاسي وعاجه وكسره
فلاح
بيني وبين عيال مفلح كلهـم سيـلٍ جـذوب
لولا غلاهم طال عمـرك ماحجـزت التذكـره
لا تحسب ان تفريق خلق الله مثل جمع الذنوب
والموت متقفيك والمسجـد بجنـب المقبـره
ملفي
يابو محمد مانقول انك صدوق ولا كذوب
الله يبارك بالشراب اللي يبل الحنجـره
ياصاحبي لا ترشد الشعار لين انك تتوب
دايم تحدث وانت بين الميمنه والميسره
فلاح
يازينها لا جات علمٍ غانم ومشلح وثـوب
وان عًدمت فالميت اصله كلب والناعي مره
انته تجاهلنا وتطعن بالقبايـل والشعـوب
ماتدري انا لا كسرنا العظم محـدٍ جبـره
ملفي
جاين على رغبتك يالقرقاح منته بمغصوب
واللي ورد عد الروى ربك يسمح مصـدره
انتم بني قحطان لا شمر ولا انتم بالحروب
واللي حدر هاك السنين الماضيه في محدره
فلاح
ماني ببيها طال عمرك لا غسول ولا شروب
الخير واجد ياعتيبه وابرد الثلـج اكبـره
حنى بني قحطان تاج المدح والنار الشبوب
وارماحنا في محزم الرجـال والا منحـره
ملفي
ركبو ثنين الطايره واثنين مالقيو ركوب
الله يعين الحاجزين وقاطعيـن التذكـره
حنى عتيبه من وحمنا يالع الضلع ويذوب
تحمد الله ياعبيدي يـوم منتـه بحجـره
فلاح
انته صحيبك خزن الارقام في بطن الحاسوب
اثره يحاول يقهر العالم عسـى الله يقهـره
الحمد لله هيبتي في كل فـج وكـل صـوب
وانته تحاول تقلب الدنيا على قـرن بقـره
ملفي
يامدفع الاعياد ليه اهل الحسا سموك طوب
مافيه غير الملح ياجعل القنابـل تفجـره
عدونا ينحاش يالقرقاح وصياحه طنـوب
حنى عمود الدين والمسلم يبا الله ينصره
فلاح
اللي تزعله البياله ربما يرضيه كـوب
والمدفع اللي قلت مايقدر يحركه اعشره
أخوكم
الصقر الحر