[معلومات العضو العماني]

الأمير عبدالرحمن السديري ((شفاه الله)) مع الأمير محمد السديري رحمه الله

يتوجه معالي الأمير عبدالرحمن بن احمد السديري ((شفاه الله )) بهذه القصيدة الى أخيه معالي الأمير محمد الأحمد السديري ((رحمه الله)) وقد شط به الحنين وهاجت به الذكرى فيقول مخاطبا ابوزيد منها:

يا من يودي سلامي لأبوزيد=هاك القبال اللي ضميري يودّه
سلام احلى من حليب المصاعيد=في خايع ٍ مرسوم وارضه مجدّه
ذكراه هاضتني وهيضت ماريد=من فيض روح ٍ هيضتها المودّه
أخوي كساب الثنا والتحاميد=ماهو بمثبور ٍ على حد قدّه
مايدرك الطولات بعض الواليد=يسرح ويمرح مايفاخت ممدّه
البيت ما يبنى بليا عواميد=ولا يستوي مجد ٍ بليا مكدّه

ويجب الأمير محمد السديري على قصيدة أخيه يحدوه فرح غامر للأبيات التي تلقاها وتنفجر حناياه حباً واعتزازاً:

اليوم انا عيدت عيد بعد عيد=وانزاح عن قلبي عنا كل شدّه
وعقب المحل سيحان صدري مواريد=مثل القفور بنبتها مستجدّه
فرحت عقب الغيض من غير تحديد=وضحكت يوم اوحيت علم نودّه
علم الفرح يجلي كثير التناكيد=ما ناش مخزن ضامري عنه صدّه
فيما مضى حسرات قلبي مواريد=وروابع بحور همّه تحدّه
واغضي عن النشدات وأعطي تصاديد=وكم واردٍ يتعب لساني مردّه
الناس بذوني بكثير التناشيد=وهواجسي تقول هاته وودّه
جاني كتاب وكّد العلم توكيد=والحمد للّي عابده مستمدّه
أهلاً عدد ما لجلج الورق بالغيد=واعداد من هلّل وركب الأشدّه
واعداد ما هلّت مزون الرواعيد=وبل ٍ من الوسمي مزونه مسدّه
بكتاب من حاش المراجل تراديد=والجود من زاكي الفروع اتسمدّه
من فرع ((ابن بدران)) قول ٍ بتوكيد=كل ٍ يجيبه بالمجال ويعدّه
زبن الدريك ان شاف غبن وتزاهيد=والحمد للّي ينهض العبد مدّه
وعز الصديق وضد من يفعل الكيد=والا انفتح باب ٍ وسيع ٍ يسدّه
اخوي ((ابوفيصل)) تخصّه بتمجيد=ثوبه من البيضا على الجسم قدّه
عسى السحاب اللي غدى له تماديد=وربرب طهاه وفضل ربي يمدّه
عساه من طعس الأراخم الى فيد=يسقى ديارٍ بأهلها مودّه
ومن غير نجد المزن يعطي تخاديد=حتي يجينا اللي كما البدر خدّه
تجي ضعون البدو يمّه عراجيد=وكلٍ يشوف احباب حيّه وبدّه
الطيب حيدٍ دون دربه تسانيد=من هامها بالهون لازم تضدّه
والقصر وأن شيّد على غير تجويد=تجيه صلفات الرياح وتهدّه
من لا ياخاطر ما يحصّل مقاصيد=ومن لافعل ما اغناه فعلٍ لجدّه