بسم الله الرحمن الرحيم
اخواني السلام عليكم ورحمة الله وبركاته
هذه قصيده لشاعر المبدع سعود بن فهد العتيبي
كتبها في معدي بن عبدالله الغباشين المسعري
وفيها وصف للقهوه وهي بالفعل قصيده جميله اتمنى ان تحوز على رضاكم
هات اليراع وهات من بيض الاوراق = واترك مثاعيله تسيّل ورقها
من هاجسٍ جاني على حسن الاوفاق = هاض المشاعر والقوافي طرقها
خله يسوق سياق لاصحاب الاذواق = اللي تروم النايفة وتعشقها
مثايلٍ مافيهن ضعيف ودقاق = نظم الاديب اللي جزاله فرقها
يجذب بنات الفكر من عمق الاعماق = جذب الدلي للضامية من عمقها
قضبتهن في مجول الفن بحلاق = وشعمت ناري لين سهرج شنقها
وقربت صفرٍ من طويلات الاعناق = صفرٍ بداج الليل يجهر لهقها
ثنتين والمحماس والنجر ابو ساق = اليا زمى هم الصدور وخنقها
انصح بهنّه كل ضايق ومشتاق = فيهن فرج ضيق النفوس وحمقها
ياعبيد جح الجمر عن كل لهاق = ودوّر خويات الكرز وافتهقها
ثم قلّط المحماس وافطن للاحراق = الحمسه الحمسه وبالك حرقها
لهله لها التقليب باسراع وارفاق = واليا ندى لامع نداها استرقها
وفالمبرد اللي به مقامير وارناق = حباتها انثرها وعتّق عتقها
ثم دقها بمرنمٍ يقرى الاشواق = ترنيمته يشعى الشقاوي نسقها
واليا اختلف صوته على مسمع الداق = الشقر فاخت النار حدّر وفقها
ثم اركها ترقل على جال شعاق = واليا لمس عرقوب ماها وسقها
افهق تلاطمها ولا انته بفهاق = عن حامي الشبّة وصلوة شعقها
والهيل والمسمار تنسيق نساق = ونسوقه ابو ساق يفلق فلقها
ثم هات لي صفرٍ شناحٍ ومعناق = رسلانةٍ هيفاٍ طويلٍ عنقها
لقّم وبهر عرف وعناد وشياق = لايابعد من دقها ثم دلقها
وسق لي ودقها يابعد كل من ساق = مهيولها تفريجها من ضيقها
لاشفه الشراب عقب العمس فاق = وان مافتح غلق الضلوع وفتقها
والا زمى له في دجى الليل براق = برقٍ مراهيشه تهامى ودقها
يشوقه اللي من ورى شعر ونطاق = سبحان من سوى الرجال وخلقها
اللي تحط المجد مرقى ومعلاق = وتشوم للعليا وتطلب رتقها
(معديّ) معدٍ على كل شوهاق = رام الجبال الشاهقة واعتنقها
و(معدي) معدٍ على كل سباق = ركايبه فالطيب محدٍ سبقها
لاصار راس وساس واوفاق واخلاق = نايف وصوفه نايفاتي فهقها
نجمٍ ليا يمم على العين شرّاق = وبحور جوده مايغلق غدقها
انا اشهد انه فالرياجيل عملاق = عنده مفاتيح القفول وغلقها
(المسعري) من فوق كل العرب فاق = اي والذي يحيى النفوس ورمقها
من لابةٍ تفصل عن الروس الاشناق =(( الاد زايد)) والطوال معشقها
مركبة صم الحصا دم وصداق = ومزبنة من جاء لها والتحقها
هم منتهى الامجاد دراس وعتاق = بحضورهم قطع الرقاب وعتقها
يالمسعري ضاع السنع والنحر ضاق = دنياي اصابتني بساطي سنقها
حطت لي الدنيا حبيله ومسباق = والحنظلة قالت تصبر وذقها
تقودني قود المطاويع بخناق = والمشكلة في سيرتي تختلقها
والحظ عاق وعاقني والدهر عاق = فيّ اختلط عج السنين وغسقها
هذا وانا يالمسعري فوق الارناق = سطرت لك نفح الهجوس وعبقها
واقبل سلامي وانت للطيب توّاق = وفزعتك يالمنعور طلّق وثقها
الله يصح السان الشاعر **ويستاهل المدح ابو معدي