ياجني سليمان وين أنت ذلحين=ليتك تجي وتجاوب الصوت في الحال
أبيك بمهمة قبل ترمش العين= وأبشر بما تامر لك الحال والمال
أبيك تاتي عندي بشيخة الزين=اللي سكنت في القلب والروح والبال
أنشهد إنها غالية بنت غالين=لو كان ماهي بنت عمٍ ولا خال
وإن كان تبغى أعلمك ساكنة وين=مدري !ولكن بيننا سهول وجبال
تدري بأوصفها بليّا عناوين=وبعده بتعرفها من أوصاف وخصال
لكن ليامن شفتها ربك يعين= بتصير اول جني يجيله هبال
ولا تشتحن لاصرت ضمن المجانين=بأحجز لك بأوتيل الإشهار منزال
كم شافها من ورع بين الوراعين=وأصبح تقل شايب وله كومة عيال
من زود هيبتها تذل السلاطين=ومن زود طيبتها تواضع للأطفال
ومن العقل ترجح بكل الموازين=ومن الثقل كأنها سيدة أعمال
ومن الطهر ماحطت عيونها بعين=ومن الستر ملبوسها دايم إسبال
في السوق ما تظهر عيونٍ ولا يدين=أسود فأسود ما تسحب وتختال
أما الوصايف حد علمي من سنين=من قبل لا تلبس لها برقع وشال
الطول يحسدها قصار وطويلين=والجسم ياويلي تقل كنه تفصال
ومن شاف عينيها سألها تنامين ؟=والشعر الأسود منحد كنه شلال
ورموشها سهامٍ تثبت بقوسين=كم جندلت من فارسٍ كان خيال
وخدودها يالينها يابشر لين=كنْها سميتها اللي تنباع بريال
والفم يجمع ثلجةٍ بين نارين= "يخرج منه شهدٍ شفاء وأمصال"
وما ودي أتعمق وأنا اخاف شيئين=شرهات غالي او تشمات عذال
للحين وانت هناه جنبي ! وبعدين=عجل جعل تاتيك حمى وسلال
يالعنبو غيرك ترى هدني البين=باموت لو طول جفاها بلا وصال
لكن تسمع هرجتي زين مازين=وأحذر يجي في قلبها منك جفال
والله لو جت تشتكي منك ياشين=لاذوقك تعذيبي ألوان وأشكال
أجل تخوفها وأسكت يامسكين=لا والله إلا الدم لين الركب سال
وإن كان فزعاتك جميع الشياطين=ترى الدواسر فزعتي صغار ورجال
وكل القبايل حضر ولا بداوين=بتفزع مع الأنسي بلا شك وجدال
ولا يغرك أنك نار وآنا من الطين=آية ويصبح يالغبي فيك زلزال
لكن قبل ما تحترق بأرمش العين=وأرجوك تاتي بمنوة القلب فالحال