السلام عليكم ورحمة الله وبركاتة
صباح الخير
نغيب وطيبكم ما يغيب
أشتقنالكم
متواضعه أن شاءالله تجوز ألكم
صلوا على النبي
<< قلعة الآمال >>
هجوس الشّعر كل ليل فـ أسترسال = تمنع عيوني من لذيذ النوم
يطحن رحاها فكري الشغّال = لين المعاني تبلغ الحلقوم
مالي معَ بدع القصيد إشكال = من دينمو الافكار للبلعوم
دايم على ذا الوضع والموّال = للجزل في قضيّتي مرسوم
صوتي يبي له حنجره واحبال = من سلك فولاذ وذهب وكروم
اربْ ناصية الشعر تحتال = فرايدن من دري المنظوم
اصعب على النقّاد والحبّال = من ساعته في يومه المحتوم
كم واحدن حدّر عليّ ومال = وأقفى عليه من الزمان ثلوم
كفي شطير وصكتي سلال = واسمي قلق واطلالتي جاثوم
طبعي كذا ماجامل الجهّال = من دون عمري مالحقني لوم
فـ انا عدو الذلّ والانذال = وانا رفيق الكايد الشغموم
ذكري معَ الوافين طيّب فال = والله مجنبني عن المذموم
لو ان جيبي مايضمّ ريال = ماجيت مستعطي ولا محروم
عليّ سرابيل الغنا سربال = ورثتها من ( زايد الملطوم )
وإلى قصرني شيء بأية حال = ماكامل الا الواحد القيوم
للصبر في عيني شُعب واشكال = واجلّها صبري على المقسوم
ماكل شيءٍ فالضمير يقال = بعض الامور تشيّب المفطوم
خج الضلوع الطاري القتّال = خلا تحت عيني أثر ووسوم
ما وقّفتْ رجلي على الأطلال = حتى عصاني قلبي المكلوم
من كثر مادمعي يشبْ وسال = ماعاد عندي ثوب فيه اكموم
خلقت اجاهد راحل ونزّال = من وين ماوجهه لقيت هموم
أحسّ بالتهميش والأهمال = ماكن لي ديرة وربعي قوم
قد لي سبوعين وثلاث ليال = كل يوم وانا اقول هذا اليوم
بآسج وابني قلعة الآمال = واعيّن اطيور الضياع تحوم
لا حول صدق ومطولك يا بال = وَ حوم كبدي من سنيني حوم
واعدت لي عشرة وانا جمّال = مافيهم اللي زبن المضيوم
مافيه داع اشمّت العذال = واذيع سري واظهر المكتوم
لابد ياتي للفرج مدخال = واذوق من رحيقه المختوم
خويي على الإيميل والجوّال = يقفي ماني في خوته ملزوم
وش خانته لا صك جالٍ جال ؟ = دام التواصل بيننا معدوم
إلى دعيته جاري الأرسال = وأنا رهين الواقع المشؤوم
عجزنا نحايل حظنا البطّال = نبكي على ماضيينا المردوم
إلى اغتنت مدينة العمّال = راحت على راع العزوم عزوم
غدا الرئيس بكفة الحمّال = من يلتفت في سورها المهدوم ؟
يا رب أجرنا حزة الاهوال = جار الزمن وتغيّر المفهوم
تتعاقب الأحداث والاجيال = كنّا بذاكرة الليال حلوم
الناس تفنا , والقبور تهال = والوقت يمضي , والسنين تشوم !
وسلامتكم
ماجد المهنا