الشاعر / مرشد البذالي رحمه الله رثى نفسه بهذه الأبيات اللي بذكرها وهوفي
المستشفى وفي غرفة الإنعاش قال أبيات حزينه ويبين العلوم الأوله ويتذكر
روحاته وجياته ويقول اليوم كبرت ويالله حسن الخاتمه والمؤمن يطلب حسن الخاتمه
من ربه فيقول مرشد رحمه الله
ياحول أظن الحق جتني طروشه = جتني مطاليبه وأنا عنه منحاش
اليوم كن بداخل الجوف هوشه = مثل اختراش الزلم في داخل الجاش
ياالله عسى عطفك ولطفك نحوشه = وياالله بحسن الخاتمه عندالأقراش
دنياك لوتعطيك حلو المعوشه = تالي سوالفها تعودعلى ماش
ياماخذينا بأول العمرشوشه = ويا مشينا مع مظاهير وأدباش
في خايع وبل الثريا رشوشه = نجني الزبيدي في صحاصيح وأدشاش
في وسط روض مخضرات خفوشه = نبته جديد ومبعدين عن الطاش
واليوم مالي مع هل الصيدنوشه = عطيتها غيري بلا سوم ببلاش
عند الطبيب وصارعندي وحوشه = ومن الأشعه صابني خوف وخراش
وهالحين شفني قاعد وسط دوشه = اصلب عضاي وكن في الجسم هشهاش
خليت ديواني ومجلاس حوشه = واليوم شفني نازل دار الإنعاش
والنفس ضاقت عقب ماهي بشوشه = مثل المقيم اللي على نو مطراش
مولم في الحوش قشة ونوشة= ينظرخويه بين مسرا ومغباش
والقصيده أطول من ذلك لكن حبيت الأختصار رحم الله الشاعر