(1)
البل تعز الرجال وتظهر أسماءها = من لاعرف قدرها مايعتني فيـــــها
من دونها غالي الأرواح بعنـــــــاها = لامن غزاها عقيداً طامعاً فيــــــــها
حنا هل البل من أولها إلى اتلاها = من دونها لابتي تظهر عزاويــــــــــها
حامينها يوم بقعا تفتل إرشـــــاها = تفرح بنا لارفع بالصوت راعيـــــــــــها
تأمن بنا كل ملحاً طاب مفلاها = ( لاد الخضيري) عما من كان غازيها
ننطح وجيه الجموع ونسحن ادواها = لي لابةً تخلف الهقوه وراعيـــــــــها
واليوم لمزاين الخضران سقنـــــــاها = في ديرةًً جعل وبل الوسم يسقيــــها
سوداً عليها الحبال البيض محلاها = تشوش روس النشامى اللي تباريها
يازينها لاعرضت والكاز يـــــــــزهاها = وسومها تجذب أهل الصنف تشريها
واليوم في ظل دولتنا وبحماهــــــــا = في ظل حكامنـــــا اللي نفتـخر فيـــــــها
(2)
سلامي على اللي رتب (مزاين الخضران) = وحط التنافس بين حرش العراقيبي
تجمل وربي جمله والكــــريم مــــعـــــان = ولاهي غريبه منك يامنبع الطيبي
أحب امدح الطيب واماريـــــــبه العــــــــــربان = رفيــــقٍ نعده من كبـــــــــــار المكاسيــــــــبي
عليك القصيد يسوقني سوق ياكحيلان = كما سوق هجنٍ عرضوها اللواهيبي
جمعت الجماعة جعل يفدونك الرديان = وفعلك تبين في طويـــــــــــل المـــــراقيـــبي
وقدمت سيـــارات مـــن غاليــــــــــة الأثمان = جوائز لمن يتعب ورى شمخ النيبي
عطايا الله اللي شوفها يبري الأحـــــــــــزان = ورث لنــــــا مافيــــــــــــه شــــكاً ولا ريبـــي
ياما وقفنا دونها وقــــــــفة الشـــجعان = وياما خذيـــــناها بحدب المقاظيــــبي
واليوم كل أهل الجزيرة ربع واخوان = فضلاً من اللي يعلم الـــــــسر والغيبي
في ظل (أبو متعب) ودرع الوطن( سلطان )= وحــــــنا تحت توجــــــــيه وأمر المعــــازيــــبي
(3)
يالابتي ترى الوعد رابع العيـــــــد = يكفيك علمٍ عن كثير العلامي
في موقعاً غرب أم رجماً بتحديد = أرضاً براحا عافيتها العســـــــــــــامي
مزايناً للجـمـــــل هن والمفاريــــد = سود الجهام اللي يدق الرضــــــــامي
يازينها لاجات يمه عراجـــــيد = إنسوقها للحفل ســـــوق الظوامـــي
من دونها (الخضران) ضد الأضاديد = لاهاب ولد اللاش رخــــــــــو الحــــــزامي
ترعى بنا في مرتعاً قفر وبعيد = حامينها من قبل وقت الســــــــــــــــــلامي
بمشوكاً بيماننا ضربه إيصيد = وحدب السيوف اللي تقص العظامي
مازعزعـــوها ناقلين البـــــواريــــد = واللي غزاها فوقه الطيــــــر حـــــــامــــي
إن بكر الوسمي على جرهد البيد = وشعشع خضار العشب عقب الوسامي
مرباعها شمال حزم الجلاميد = ومصيافها بالعــرق يـــــــم العـــــدامــــــــــي
(4)
ياهل البل عزوتي يامنـــزحت الحــريب = قربوها كلها دقها وجـــــــلالها
قربـــوها للمزاين تـــــرى وقتـــه قـــــــريب = وجهزوها جعل فال السعادة فالها
ماحلا شوف المجاهيم حلـــوات الحليب = في مراتعها القديمة وفي مدهالهـــا
في ذرى (لاد الخضيري) هل الراي الصليب = لابةً يوم الحرايب يظل ظـــــــلالها
دون سرفات العشـــاير لهم فعلا عجيب = والحميــــه والكــرم دايماً يــبرالـــهـا
سعد من هم محزمة لاعوا ذيباً لذيب= مايشـــــــيل الحمل لازاد غيــــــر اجمالـــها
جارنا في دارنا ماتقول انــــــــه غريــــــــب = عادةً فيـــنا مــــــن أســـــــلافـــنا لجيـــــالـها
وان زبنا خائفاً ضده الوقت العصيب = دونـــــــــــه الأعمــــــار ويـــــن أنت يادلالـــهــــا
(5)
يامرحباً في مخيم الرجال شيال الحمول= النادر اللي دون ربعه يرتكي لحمولها
(أبو تميم) اللي الي من قال بمر الله يطول= له هقوة تصعب على بعض الرجال أطولها
منصى مطاليق الرجال أبنا المناعير الزحول= له مجلس ٍ فيه النشاما مايوني ضولها
حراً يهوم المرجلة لو دونها العارض يحول= بينه وبين أسمانها ما يرتخي مرسولها
الطيب ورث وهبة ً من عند خلاق العقول= مايفرق الرجال من الرجال غير اعقولها
سلام ياللي مسرجاً خيله مع أصحاب الخيول= في ساحة أعلوم المراجل مسرجين أخيولها
يذكر إلى عدوا هل الراي السلاطين الفحول= لاقامت أفروع القبايل تفتخر بزحولها
انت الفخر والطيب بين فيك حولاً بعد = ماتستوي روس العرب يامسندي ورجولها
جمعتنا عند البل اللي شوفها يبري معلول= على الشحم والدلة اللي ما يوقف دولها
بنات هرشٍ طبعهن دايم يخازرن الذلول= سند الغوارب ماوقف ولد الشريطي حولها
علط الرقاب مشرهفات آذان فيهن ويش أقول= عراض الجنوب اللي تناوش جنبها من طولها
ورثٍ لنا من قبل يشرون الأبل كبار الحثول= ناسٍ تشيل أريالها وجنيها بحثولها
حنا هل البل يوم الأيام المخيفه والفعول= يوم القبايل في الجزيره تفتخر بفعولها
خيالة الحرشاء لنا في ساحة العلياء نزول= تاريخنا مهوب هرج مقرقعين أطبولها
واليوم راح الشر بس الناس كل له ميول= والرابح اللي يحفظ النعمه ورد النفس عن ميولها
في ظل من يمشي بشرع الله مع هدي الرسول= (عبدالله) اللي حكمته كل الدول حيولها