السلام عليكم
اسعد الله جميع اوقاتكم بكل خير
قصيده القيتها امام امراء وشيوخ واعيان وافراد الدواسر بعد ضهر الجمعه فى مجالس الشيخ سعود بن ناصر بن غصين
عند الرجال اللى تروس الطيب وتروس الفخر = يامرحبا ترحيبتن تمشي على السلك الحرير
يامرحبا يااهل الكرم واهل الشهامه والضفر = خطلان الايدى لابتى كبيرها ويا الصغير
يامرحبا ياربعنا حشمه وتقدير وقدر =قبيلتى وافعالها واجد مدلهة القصير
اهل الصدور النيره تبعد عن اجواء الضجر = واكبر دليل ان الدواسر جمعها الليله الكبير
من زايد وتغلب هل القلات بدوان وحضر = من طيبها وافعالها تقلط على الجمع الغفير
دام الدواسر عزوتى يالشعر ماعندك عذر = انباء سادات العرب مثل المبشر للبشير
افعالنا كسب الجميل وكسب حسكات الوبر = فى ساعتن خصامنا راسه من متونه يطير
يشهد لنا التاريخ عند السلم ولا فالخطر = حنا هل الميقاف للاحلاف حددنا المصير
وحنا هل الفزعات والنخوات والعلم الوقر = عدونا من جمعنا غصبن على خشمه ينير
فالسيف الابتر قد خذينا الضلع والقاع القفر = وايضا خذينا الاسم والناموس والخير الوفير
ديارنا فى اسمنا تدعا ويسمع من حضر = وسم العصا فينا وحنا اللى محددت البعير
وحنا خول الطيب واهل الطيب حكام وبشر = وحنا عمام اللى تعمم فى لقا اليوم الخطير
حنا الدواسر زايد وتغلب بعيدين النظر = رجالنا من طيب راسه مايدورله شوير
للمدح دور ومجلس الممدوح عامر واعتمر = عمره من جعله مخلد فى جنان الله قرير
ناصر ولد منصور ابن غصين فى وقته شهر = مثل القطامى يشهر الجنحان يكفخ ثم يطير
ابو المكارم طيب المجنا على العليا ضهر = مناقبه واجد وخيره فى عباد الله كثير
مامات من ورث ولد واحفاد وافين الذكر = وناصر ولد منصور مايبغي على ذكره دوير
ورث قروم معربه مافيهم اللى قد قصر = زحول ورث زحول تشدا الحد للسيف الشطير
واثنى على راعي الكرم فالجود سواله مقر = سعود ابن ناصر عديم الوصف والوجه السفير
ابو المواقف لامشي يمشي على الدرب الخضر = تشهد له الاحداث والميقاف والفعل المنير
من فضل ربي لابغي الحاجه على الحاجه قدر = حاجة ابو عبد العزيز اتصير لون ماتصير
المرجله فسعود والافعال من منها مفر=يدحم بمتنه كل كايد لين يصبحله يسير
تصير سهله لوها تلبس من ثياب القشر = الحض طيب والمعانى ورد وانفاس العبير
سيفن مجرب مايبي نشده على فعله جهر = انا اشهد انه نومس الافعال ويسر الضمير
واختامها صلي الله وسلم على سيد البشر =صلي الله وسلم على الهادى محمد والنذير
وسلامتكم