لو يجف الملح فجأة .. من شرايين البحر =وترجع اسراب الحمام اللي بعيد مهاجره
لو تعاف النار ترقص فوق عيدان الشجر =ويدمح المغدور غدر الغادر اللي غادره
لو سبع المعجزات اللي عرفناها عشر =وشفتهن قدام عينك شوف عين باصره
مانسيتك لو آموت من الغبينه والقهر =ولا سليتك والعيون بطيب خاطر ساهره
لا تقول انسى وانا مالي على بعدك صبر =خلني بس احتريك .. وخل قلبي خابره
يحتري وان غبت عني من دقيقه لا لشهر =يحتري واللي تحرى في سواتي عاذره
لا تروح وتبتر الوصل وعناوينه ...بتر =ثم يحاصرني خيالك فالمساء .... واحاصره
يا بعد من طاف قلبي واعتكف به واعتمر =يا بعد حب كتمته ... والعيون اتجاهره
يا غرام شق صدري من ضلوعي للنحر = ولا قدرت افتك عمري من يده وأناحره
تلني لاهيب تله لا صديق ولا غدر = غصب عني كني المسحور واللي ساحره
ما نفعني باس قلبي والشكاله والظفر =التفت ولا لقيت عزوم قلبي حاظره
اكتشفت انك حظرت وغاب محظور البشر= واكتشفت ان الطبيعه لو تباها سافره
يا كتاب فيه سر الحسن كله مختصر = ما يجيبك حسن غيرك لو يجيب محاظره
لا تقول انسى ...ولا تهتم في وتنتظر = ثم تغيب وتلحق اسراب بعيد مهاجره
وان عزمت تغيب تكفى اجل شوي السفر =لين ينشف في عروقي ملح بحر(ن) خابره