اخواني اعظاء هذا المنتدى الموفق يسعدني التواصل معكم مجددا بهذه القصيده واملي ان تنال اعجابكم وتقديركم
تجارب العراف فيها الكفايه=مواعظٍ تظهر قلوب الرجاجيل
ودليلةٍ للي بممشاه تايه=توجهه وتنـبهه بالمقابيل
ومن ظاع ما دله على العرف رايه=ياخذ من اشوار الرجال المشاكيل
اقولها والقول مني روايه=جري الجنوبي قالها فالتماثيل
وانا ولو ماخطيت ماظمن قدايه=با اعطي لمن ينشد عن الحال تفصيل
احترت ما ادري كيف بادرك منايه=لي مطمعٍ سهلٍ صعيب المناويل
هو غايتي ويسوقني له اهوايه=وا شوف مالي فيه حلٍ ولا حيل
حله يبي من يعتني به عنايه=ياوين بالقى اللي برايه تنافيل
ينصح برايه لا درى بالحكايه=لا جيت ابي منه لدعواي تحليل
اما يخطيني بحالة خطايه=ولا يقول اعزم ودربك تساهيل
لاني عليه اقبل واعوّد ورايه=ما اصدرت لي رايٍ يجي له محاصيل
ان قلت انا اني منه باقطع رجايه=ما شفت لي في طرد غيره مداخيل
وان جيت انا صوبه باورد ارشايه=بينت مقصودي وكثرت الاقاويل
ما ودي انه يبـين لي فيه غايه=واقوّم النيام في تالي اليل
وان قاموا النيام حطت جنايه=ما عاد يلحق علمها سبق الخيل
اما بني دعوىٍ بليا دعايه=او كبر الموظوع للناس بالحيل
والناس فيهم من يحب الوشايه=من سمع كلمه حط معها دهاويل
ان ما حما الرجال عرظه حمايه=تعرظوا عرظه هل القال والقيل
قد قيل يغني مالعلاج الوقايه=وصفة دواً تبقى لجيلٍ بعد جيل
واللي من الله مايجي له هدايه=تجنح به اضنونه عن الدرب ويميل
ردعت نفسي مالزلل فالـبدايه=ومجاهد النفس بهواها بهاذيل
ومن لا حسب لبداية امره نهايه=لازم تصيده محكمات المحابيل
سلامتكم جميعاً