بسم الله الرحمن الرحيم
الاخوة الاعزاء ادارة وأعضاء وزوار منتدى الدواسر الشامخ،،
السلام عليكم ورحمة الله وبركاته ، وبعد،،
أتشرف بالانضمام اليكم وأود المشاركة بهذه القصيدة وقد قلتها في الرائد/مرزوق محمد الدوسري عام 1423هـ ، وأتمنى أن تحوز على رضاكم
سمّيت باسم اللي خلقنا من الطين
الرازق المعبود جزل الوهايب
اللي بحكمه تستقر الموازين
عالم سرايرنا ومنشي السحايب
سر ياقلم واكتب لمرزوق بيتين
من ضامرن يصلاه مثل اللهايب
القايد اللي حزة العسر واللين
ما يرجع الطلاب لاجاه خايب
من لابةٍ فيها الرجال المسمين
سقم العدا يوم الليالي نهايب
ألآد زايد فعلهم قبل وألحين
مصايبٍ عند احتدام المصايب
قدّمت معروضي باجازة سبوعين
قالوا تجيب اعذار والا سبايب
اما تجيب اثبات من حاكم الصين
والا تموت لك عجوزٍ وشايب
من بعدها هلّت دموعي من العين
ناظر دموعي فوق خدي سكايب
يابومحمد لي عن الدار عامين
ما جيت لديار الاهل والقرايب
الغيم من فوق الشجر والبساتين
والسيل من تحت المراقيب سايب
والخوخ والرمان واللوز والتين
والورد بخدود المزايين ذايب
طقّمت برجستُن وفللت بنزين
للموتر اللي مثل حر الركايب
اما ارخصوا لي يوم خمسة وعشرين
والا اكتبوني فالكشوفات غايب
وسلامتكم،،،
أخوكم خالد بن مشرف العمري