[معلومات العضو ظافر الأمير]

بيوت الشعر لو كانت عصيّه=من اجلك جبتها جزله قويّه
صلاة الله وتسليمه تزورك=يا خير الخلق يا هادي البريّه
نبيٍ واصطفاك الله بفضله=رسول الخلق واختارك صفيّه
عزيز النفس محمود السجايا=كريم الطبع يا جزل العطيّه
فسبحان الذي كمّل وصوفك=جميل الخلق والريحه زكيّه
نعم والله بلّغت الرساله=ووصّلت الأمانه والوصيّه
جليت (ا)بنورك الظلم (ا)ومحيته=وبدّلت الجفا والجاهليّه
بدين الحق عنوان التسامح=بفضله صاروا العالم سويّه
تسيّدنا الأمم من نور هديك=كسبنا المجد بقلوبٍ وعيّه
بَعَد ما كانت اشعوب (ا)وقبايل=تشيع ابها الفتن والعنصريّه
توحدنا بدستور الشريعه=كتاب الباري (ا)وسنة نبيّه
وعمّ الفضل والقرآن يتلى=في ارض الله بأصواتٍ شجيّه
بعثك الله لنا عزٍ ورحمه=تعلّمنا المكارم والحميّه
تعلمنا التكاتف والتكافل=وكيف الصبر لو جات البليّه
تعلّمنا التواصل والتراحم=وكيف الحبّ تزرعه الهديّه
وكيف إن الخطا تمحوه توبه=ونعبد ربنا من حسن نيّه
وكيف إنا يجب نعفوا ونصفح=نصون النفس ونصون الرعيّه
وتقوى الله ميزان الكرامه=وهي فرق العرب عن لعجميه
أبا القاسم فداك ابي وأمي=ووجداني وما ملكت يديّه
فلا والله لن يوفيك شعري=لو اكتب كل صبحٍ أو عشيّه
صلاة الله وتسليمه تزورك=يا خير الخلق يا هادي البريّه