سلام الله عليكم يا سلالة عامر ابن زياد

[معلومات العضو أبـ ريماس ـو]

قصيدة للشاعر الكبير محمد بن باني بن عقاب المخاريم الدوسري الذي القاها في حفل ال عامر من البدارين الدواسر في ساجر

اببدا بسم من كل العباد لطاعته سجّاد=الهٍ ماتحكم اهل الشريعه غير بكتابه
تخيّرت القصيد الجزل من خوفي من النقّاد=ابا انقيه عن كل الشوايب واقفل ابوابه
بعد ماجتني الدّعوه من اغلا الناس ماش قعاد=من الوادي مشيت وطول خطي ماحسب حسابه
سلام الله عليكم يا سلالة عامر ابن زياد=ابن بدران عوق اللي من العدوان حرابه
بدارين تشجعنا فعايلكم قدم وجداد=سلاطينٍ نهار الهوش للأرواح جلاّبه
فعايلكم ماينكرها ياكود الخايب الجحّاد=لكم تاريخ يزهى بالفخر والفخر يزها به
بدارين لكم بعلّا سنام المرجله ميعاد=ينابيع الكرم وايضا على العدوان غلابه
مواقفكم ليا منه قدح فوق الفتيل زناد=تروون الصقيل اللي يقص العظم مضرابه
سوالفكم يجف ابها القلم وتعب القصّاد=لكم تاريخ يتعب من يعد المجد ماوفا به
اتكفّيكم سواليف الضمين اللي بطيبه جاد=((زعيم رجال دوسر)) يومها غارات ونهابه
ولكم ماضي يسر الاصدقا ويزعل الحساد=وحنا نفتخر به لاسمعناه وقرينا به
ولكم تاريخ في وادي الدواسر مايبا استشهاد=شهوده صفحة التاريخ و سطوره وكتابه
بعد رحتوا عن الوادي ملكتوا وسط نجد بلاد=ملكتوها بسيفٍ عزة اسنانه من انصابه
ملكتوا مدن تاقع فوق خشم العارض المنقاد=يهابون القبايل حدّها محدٍ تهقوا به
بلادٍ من غزاها وشاف فعل اصحابها ماعاد=سوات الغابه اللي في طرفها نمور وذيابه
وليا جات الحمايا ثم حصل بين الرجال عناد=لكم عند اللزوم الكايده ربع ولكم لابه
دواسر يو م صولات القبايل مالهم ردّاد=سوات السيل لانحا من وقع في دربه اقفا به
صناديد يروّون السيوف مطوّعة من كاد=مهدين الصعوب اليا قبس للحرب مشهابه
وهم زبن الدخيل اللي وراه امن العدا طرّاد=سوات بن مطرّف يوم خصمه جاه وارها به
وزبن عند الدواسر وانطحوا الاشراف جد عماد=وخلّوا خصمهم لاجاه سرحانٍ تعشا به
زحازيح مع طول الزّمان امجادهم تزداد=حماهم مايداس ومن بغاه يخاف ويهابه
وصلاة الله عدد ما هل وبل ودندن الرعّاد=على وجه الرسول اللي هدانا واهتدينا به

 

 

 

 

[معلومات العضو حفيد الضمين]

وانعم والله بشاعر بيض الله وجهك باابو ريماس

 

 

 

 

[معلومات العضو متعب الشكري]

صح الله لسانك ولسان الشاعر محمد بن باني قصيده طيبه بارك الله فيك يابوريماس تحيأإتي

 

 

 

 

[معلومات العضو عناد الخيل]

صح لسان الشاعر ولاهنت على النقل

 

 

 

 

[معلومات العضو أبـ ريماس ـو]

اشكرم جميع ع مرورك

 

 

 

 

[معلومات العضو اضمين]

جزاك الله خير وبيض الله وجهك وصح لسان الباني