واحزني اللي في الحشا عبدالله بخيتان المخاريم

[معلومات العضو متحري الصدق]

إخواني أعضاء وزوّار المنتدى أضع بين أيديكم قصيدة للشاعر عبدالله بن بخيتان المخاريم آمل على أن تحوز على رضاكم

واحزني اللي في الحشا يرهق ارهاق=أزريت أبيّن عنه وأزريت أكنّه
إن جيت أبا أكنّه فلاهوب ينطاق=وان كان بحته ما حدٍ سأل عنّه
لا والله إلا صرت للضحك مشتاق=و ولّت وناسة نفسي المرجهنّه
سجّلت لوعاتي على بيض الأوراق=وأطلقت لأفراس القصيد الأعنّه
تنصا الرفيق اللي بعد رفقته باق=وطبايع أهل الطيب ما ترد عنّه
تخبره بأن ما فيه عهدٍ وميثاق=أهل العقل ما تجتمع بالمجنّه
من أولٍ في القلب ساكن بالأعماق=بس أتحفابه وأعزّه وأحنّه
واليوم لا بالله بتسعين طقّاق=من بار فيني شلتنا الكف منّه
فيا سايق الفنجال من قبل ينذاق=((لمحمد بن مريف)) عدّه وثنّه
يستاهل الفنجال والكيف لا انساق=يستاهله قرم الرياجيل لأنّه
قرمٍ إلامن صاحبه عصّب وضاق=من طيبه الأنفس تجي مطمئنّه
للمرجلة قايد وهاوي وعشّاق=ومن ظن فيه الخير ما خاب ظنّه
فجعل السحاب إليا برق فيه برّاق=وجا للرعود بداخل السحب حنّه
بأمر الله الرزّاق بالريح ينساق=ويمطر على ((خيران)) من غير منّه
مربا الرفيق اللي تعلاّ بالآفاق=اللي له الطولات شرعٍ وسنّه
صحيح مقياس الرجولة بالأخلاق=ماهوب كبر الرجل أو صغر سنّه

وتقبلوا تحيات متحري الصدق

 

 

 

 

[معلومات العضو ابو فهد الغييثي]

صح السان الشاعر على القصيد الرائعه

ولاهنت على طرحها ويعطيك العافيه

وننتظر الجديد من ابداعاتك

تحياااااااااااااااتي

 

 

 

 

[معلومات العضو الزين]

صحيح مقياس الرجولة بالأخلاق=ماهوب كبر الرجل أو صغر سنّه

بيض الله وجهك يامتحري الصدق علي نقل القصيده الاكثر من رائعه

وصـــــــــح لسان شاعرها

 

 

 

 

[معلومات العضو شافي القويسي المخاريم]

صح لسان الشاعر الجزل عبدالله بن بخيتان المخاريم
ويعطيك الف عافيه اخوي متحري الصدق على الطرح
الجميل
تحيااااااااااااااااتي

 

 

 

 

[معلومات العضو متحري الصدق]

ابو فهد/ الزين / القويسي من قال ما هان والله يبيض وجيهكم على المرور اللي شرفتوني به والمعذره في التأخر في الرد